فلم’جب وی میٹ‘ دیکھ کر اداکاری کا فیصلہ کیا،انوشکا شرما

ممبئی(ویب ڈیسک) بولی وڈ اداکارہ انوشکا شرما اپنی اگلی فلم میں بولی وڈ کنگ شاہ رخ خان کے ہمراہ کام کرتی نظر آئیں گی، جس کی ہدایات ان کی پسندیدہ فلم ’جب وی میٹ‘ کے ہدایت کار امتیاز علی دیں گے۔

انوشکا شرما نے بولی وڈ میں اپنے کیرئیر کا آغاز شاہ رخ خان کے ہمراہ فلم ’رب نے بنادی جوڑی‘ سے کیا تھا جس کے بعد وہ کنگ خان کے ساتھ ایک اور فلم ’جب تک ہے جاں‘ میں کام کرتی نظر آئیں۔این ڈی ٹی وی کی ایک رپورٹ کے مطابق انوشکا شرما کا کہنا تھا کہ ’میں ہمیشہ سے ہی شاہ رخ کے ساتھ ایک رومانوی فلم کرنا چاہتی تھی، ‘رب نے بنادی جوڑی’ مجھے اُس طرح کی رومانوی فلم نہیں لگی جیسی میں چاہتی تھی کیوں کہ آدھی سے زیادہ فلم میں تو میں جانتی ہی نہیں تھی کہ لڑکا کون ہے، امتیاز علی کی فلم کافی رومانٹک ہے‘۔

اداکارہ کا مزید کہنا تھا کہ ’امتیاز علی کو رومانوی فلمیں بنانا بہترین انداز سے آتا ہے، وہ لڑکے اور لڑکی کے آپس کے رشتے کو خوب سمجھتے ہیں اور شاہ رخ خان کو چونکہ رومانس کا کنگ کہا جاتا ہے تو مداحوں کے لیے یہ فلم بہترین ہوگی‘۔

انوشکا شرما نے یہ بھی بتایا کہ امتیاز علی کہیں نہ کہیں ان کے اداکار بننے کی وجہ بھی ہیں۔

انوشکا نے کہا، ’میں نے کبھی سوچا بھی نہیں تھا کہ میں اداکارہ بنوں گی، لیکن جب میں نے جب وی میٹ دیکھی تو مجھے کرینہ کا کردار بے حد پسند آیا، میں نے سوچا یہ کچھ ایسا ہے جو میں بھی کرسکتی ہوں، اس لیے امتیاز میرے لیے بہت خاص ہیں‘۔

واضح رہے کہ انوشکا کی نئی فلم کی شوٹنگ کا آغاز رواں برس اگست سے ہوگا۔

پنھنجي راءِ لکو