مہمان سے بدتمیزی کرنے پر سلمان نے محافظوں کی چھٹی کرادی

ممبئی(آن لائن نیوزاردو پاور) بالی ووڈ کے دبنگ اداکار سلمان خان نے مہمانوں کے ساتھ بدتمیزی کرنے پر اپنے گارڈز کو ہی نوکری سے نکال دیا۔
بالی ووڈ کے سلطان سلمان خان صرف اداکاری کے ہی نہیں بلکہ دلوں کے بھی بادشاہ ہیں، ان کا شمار بالی ووڈ کے صف اول کے اداکاروں کے ساتھ دوست نواز انسانوں میں بھی ہوتا ہے، سلومیاں کا اپنے دوستوں اور قریبی افراد کو قیمتی تحائف دینا معمول کی بات ہے یہ ہی وجہ ہے کہ بھارتی انڈسٹری میں ہر کوئی ان کا گرویدہ ہے۔
تاہم سلمان رحم دلی کے ساتھ اپنے موڈ کی وجہ سے بھی خاصی شہرت رکھتے ہیں جو پل میں بدل جاتا ہے، سلمان غصے کے کافی تیز ہیں اور غصے کے وقت وہ یہ نہیں دیکھتے کہ آس پاس کون ہے حال ہی میں ان کے محافظ دبنگ خان کے غصے کا نشانہ بنے۔
بھارتی میڈیا کے مطابق سلمان خان اکثر اپنے گھر میں مختلف تقاریب کا اہتمام کرتے رہتے ہیں جس میں ان کے قریبی عزیزوں سمیت دوست وغیرہ بھی شرکت کرتے ہیں سلمان اچھے میزبان ہونے کا ثبوت دیتے ہوئے اپنے مہمانوں کے ساتھ بدتمیزی بالکل بھی برداشت نہیں کرتے حال ہی میں تقریب میں شریک اپنے مہمان کے ساتھ بدتمیزی کرنے پر انہوں نے اپنے محافظوں کو نوکری سے نکال دیا۔
ایک سیکیورٹی گارڈ نے نام نہ ظاہر کرنے کی شرط پر بتایا کہ تقریب میں شریک ایک مہمان نے وہاں موجود محافظ کے ساتھ بدتمیزی کرنی شروع کردی جواب میں گارڈ نے بھی مہمان کے ساتھ بدتمیزی کی اور بحث جاری رکھی یہاں تک کہ دونوں کے درمیان ہاتھا پائی بھی ہوگئی، جس پر سلمان نے وہاں موجود گارڈز کو فارغ کردیا تاہم دوسرے گارڈزنے سلمان خان سے کہا کہ آپ ایک گارڈ کی سزا ہم سب کو کیوں دے رہے ہیں اس کے جواب میں سلمان نے غصے میں گارڈ کو ڈانٹ دیا اور کہا کہ تم بہت زیادہ بول رہے ہو۔
اس خبرکوبھی پڑھیں: سلمان خان نے مداح کو جھڑکنے پر اپنے ہی محافظ کو تھپڑ دے مارا
سلمان کے غصے کا نشانہ بننے والے گارڈ کا کہنا تھا کہ سلمان خان دل کے بہت اچھے ہیں وہ ہم سب کا بے حد خیال رکھتے ہیں لیکن ان کے موڈ کا کچھ پتہ نہیں ہوتا کہ کب خراب ہوجائے اور غصے میں سلمان بھائی کسی کو نہیں دیکھتے بس حکم جاری کردیتے ہیں اور ہمارے پاس ان کا حکم ماننے کے علاوہ اور کوئی چارہ نہیں ہوتا۔
واضح رہے کہ اس سے قبل بھی سلمان خان نے ذاتی معلومات لیک کرنے کے جرم میں اپنے تین باڈی گارڈز کو فارغ کردیا تھا۔

پنھنجي راءِ لکو