Urdupower Net Work/www.urdupower.com/power of the truth/Doctor/latest/Yellow fever


Telephone:- 1-514-970-3200	Email:-jawwab@gmail.com
مرکزی صفحہ پر جانے کے لیے کلک کریں

تاریخ اشاعت:۔09-07-2010
نیند اور بے خوابی


ہم روز ہی سوتے ہیں۔ سونا جاگنا ہمارے روزمرہ کے معمول میں شامل ہے۔ کچھ لوگ ایسے ہوتے ہیں جنہیں نیند بہ آسانی آتی ہے اور کچھ ایسے افراد بھی ہوتے ہیں جو ہمیشہ بے خوابی کی شکایت کرتے ہیں۔ بے خوابی کی شکایت دائمی طور پر کم ہی ملتی ہے۔ عام طور پر چند افراد کے سوا زیادہ تر میں بے خوابی کی شکایت وقتی ہوتی ہے۔ پریشانی‘ تشویش‘ نفسیاتی دبائو اور خوف کی وجہ سے نیند متاثر ہوتی ہے۔ اسی طرح چند جسمانی امراض میں بھی نیند متاثر ہوجاتی ہے اور جیسے ہی ان امراض کا قرار واقعی علاج ہوتا ہے ویسے ہی نیند کی کمی کی شکایت بھی دور ہوجاتی ہے۔ دراصل نیند کا نظام بہت نازک ہے اور یہ نظام جسمانی و ذہنی خرابی ہونے کی صورت میں متاثر ہوجاتا ہے۔ کسی بھی صحت مند شخص کے لیے نیند بہت ضروری سمجھی جاتی ہے۔ نیند نہ آنے کی صورت میں تھکان اور دن کے اوقات میں غنودگی کا بڑھ جانا‘ توجہ کے ارتکاز میں کمی‘ جھنجھلاہٹ اور چڑچڑاپن وغیرہ مزاج میں شامل ہوجاتا ہے۔ اس مضمون میں ہم نیند کے نظام‘ اس نظام میں واقع ہوجانے والے خلل اور اس نظام میں خلل کے اسباب اور ان اسباب کے سدباب کے بارے میں نہایت آسان طریقے بتائیں گے۔ جب ہم سوجاتے ہیں تو دراصل ہم اپنے اردگرد کے ماحول سے بے خبر ہوجاتے ہیں۔ قدیم معاشروں میں نیند کو چھوٹی یا جز وقتی موت سمجھا جاتا تھا اور یہ بات کچھ اتنی غلط بھی نہیں ہے۔ ہم بے خبرہوتے ہیں‘ تاہم ہمارا جسمانی نظام اپنا عمل جاری و ساری رکھتا ہے۔ نیند ہماری ضروریات میں شامل ہے۔ ہم نیند سے بیدار ہونے پر اپنے آپ کو ترو تازہ اور ہشاش بشاش محسوس کرتے ہیں اگر ہماری نیند اچٹ رہی ہو‘ یا بار بار ہماری آنکھ کھل جائے تو ہم ترو تازگی کی اس کیفیت کو محسوس نہیں کرتے ہیں۔ اسی سے معلوم ہوتا ہے کہ نیند ہمارے جسمانی نظام میں کتنی اہمیت رکھتی ہے۔ ایسا نہیں ہے کہ نیند کے دوران ہمارے جسم کی ایک ہی کیفیت رہتی ہو۔ ہمارا دماغ اور ہمارا جسم نیند کے مختلف مدارج سے گزرتا ہے۔ یہ مدارج درجہ اول نیند سے لے کر درجہ چہارم نیند تک کے مدارج ہوتے ہیں۔ درجہ اول نیند ابتدائی نیند کی کیفیت ہوتی ہے اور درجہ چہارم نیند انتہائی نیند کی کیفیت ہے۔ اس کے بعد آنکھوں کی تیز حرکت والی نیند کا درجہ ہے۔ درجہ چہارم سے ہمارا ذہن اور ہمارا جسم آنکھوں کی تیز حرکت والی نیند کے درجے میں جاتا ہے۔ ہماری روزانہ کی نیند کا تقریباً پانچواں حصہ‘ اسی قسم کی نیند پر مشتمل ہوتا ہے۔ یہ آنکھوں کی تیز حرکت والی نیند ایک عجیب و غریب کیفیت ہوتی ہے۔ ہماری آنکھیں اس نیند کے دوران دائیں اور بائیں تیزی سے حرکت کرتی ہیں۔ ہم خواب دیکھ رہے ہوتے ہیں۔ ہمارے دل کی دھڑکن‘ اور سانس کی رفتار بڑھ جاتی ہے اور ہم جنسی طور پر بیدار ہوجاتے ہیں۔ اس کے ساتھ ساتھ ہماری جلد میں خون کی رفتار بڑھ جاتی ہے اور جسمانی درجہ حرارت بھی تھوڑا سا بڑھ جاتا ہے۔ دماغی عمل کی رفتار تیز ہوجاتی ہے اور دماغ اتنا ہی بیدار ہوجاتا ہے جتنا کہ حالت بیداری میں بیدار ہوتا ہے۔ نفسیاتی محققین نے آنکھوں کی تیز حرکت والی نیند کو‘ حیات کی تیسری حالت قرار دیا ہے۔ یعنی اول حالت حیات کی بیداری ہے۔ دوم حالت حیات کی نیند ہے اور سوم حالت حیات کی آنکھوں کی تیز حرکت والی نیند ہے۔درجہ اول نیند سے درجہ چہارم نیند تک ہمارا دماغ نیند کی حالت یعنی سکون کی معمول والی کیفیت میں رہتا ہے۔ تاہم ہمارے ہارمون ہمارے خون کے دوران میں شامل ہوکر جسم کے مختلف حصوں میں پہنچتے ہیںاور ہمارا جسم اپنی روزانہ کی ٹوٹ پھوٹ کی مرمت کرتا ہے۔ نیند کی حالت کی بنیادی معلومات حاصل کرنے کے بعد اب یہ سوال پیدا ہوتا ہے کہ ہمیں کتنی نیند درکار ہوتی ہے؟ نیند کی مقدار ہماری عمر اور ہماری جسمانی تھکاوٹ سے تعلق رکھتی ہے۔ نومولود بچے تقریباً سترہ گھنٹے روزانہ سوتے ہیں۔ ذرا بڑی عمر کے بچے نو سے دس گھنٹے روزانہ سوتے ہیں اور بالغ افراد کے لیے آٹھ سے نو گھنٹے کی نیند کافی ہوتی ہے۔ جب ہم بوڑھے ہونے لگتے ہیں تو ہماری نیند کی مقدار کم ہوجاتی ہے۔ ہر شخص کی نیند کی ضرورت مختلف ہوتی ہے۔ کچھ افراد تین سے چار گھنٹے سوکر بھی ترو تازہ ہوجاتے ہیں مگر ایسے لوگوں کی تعداد کم ہے۔ یہ دیکھا گیا ہے کہ دوپہر میں سوجانے سے رات کو نیند دیر سے آتی ہے۔ یہ بھی دیکھا گیا ہے کہ جسمانی کام کرنے والے افراد‘ یا ورزش کرنے والی افراد کی نیند ان لوگوں کے مقابلے میں جو جسمانی محنت نہیں کرتے ہیں‘ بہتر ہوتی ہے۔ فرض کیجیے کہ اگر نیند نہ آئے تو کیا ہوگا؟ کبھی کبھار کی بے خوابی کے اثرات کچھ اتنے زیادہ نہیں ہوتے ہیں لیکن مسلسل بے خوابی کے اثرات بہت شدید تھکان محسوس ہونے لگتی ہے اور دن میں بار بار‘ غنودگی کی حالت طاری ہوجاتی ہے۔ قوت فیصلہ کمزور ہوجاتی ہے اور طبیعت میں اداسی رہنے لگتی ہے۔ یہ کیفیات ان افراد کے لیے بہت خطرناک ہوتی ہیں جو بھاری گاڑیاں ڈرائیو کرتے ہیں یا بھاری مشینوں کو آپریٹ کرتے ہیں۔ روزانہ دنیا بھر میں ہونے والے حادثات کی ایک بڑی تعداد اس وجہ سے بھی ہوتی ہے کہ ڈرائیور کی نیند پوری نہیں ہوئی تھی۔ اسی طرح زبردستی جاگتے رہنے یا بلاو جہ کی شب بیداری کے بھی مضر اثرات مرتب ہوتے ہیں۔ بے خوابی کی عام شکایات میں مندرجہ ذیل شکایات شامل ہیں۔ ١۔ نیند آنے میں دشواری ہوتی ہے۔ ٢۔ بار بار آنکھ کھل جاتی ہے۔ ٣۔ جلدی آنکھ کھل جاتی ہے۔ ٤۔ رات بھر سونے کے باوجود صبح میں طبیعت ترو تازہ نہیں ہوتی ہے۔ بے خوابی کی شکایت کرنے والے زیادہ تر افراد دراصل اپنی نیند کی مقدار تو پوری کرلیتے ہیں مگر ان کی نیند کے وقفوں کے درمیان جو بیداری کے لمحے آتے ہیں وہ ان کے لیے تکلیف دہ ثابت ہوتے ہیں۔ چند باتیں جو آپ کی نیند کو بھگاتی ہیں اور آپ کے لیے سونا دشوار بنا دیتی ہیں وہ یہ ہیں۔ ١۔ آپ کی خواب گاہ میں شور اور تیز روشنی کی موجودگی نیند کی راہ میں رکاوٹ ڈالتی ہے۔ ٢۔ آپ کا بستر آرام دہ نہ ہو تو نیند نہیں آتی ہے یا اگر آپ کا بستر حد سے زیادہ گرم ہو یا از حد سرد ہوتو نیند آنے میں دشواری ہوتی ہے۔ ٣۔ اگر آپ کے سونے جاگنے کے معمولات میں تبدیلی ہوجائے تو بھی آپ کی نیند پر اثر پڑتا ہے۔ ٤۔ اگر آپ جسمانی محنت بہت کم کرتے ہیں اور آرام دہ زندگی بستر کرتے ہیں تو بھی آپ کی نیند پر اثر پڑتا ہے۔ ٥۔ اگر آپ بہت زیادہ غذا لیتے ہیں تو بھی آپ کی نیند متاثر ہوتی ہے۔ ٦۔ اگر آپ بہت کم کھاتے ہیں تو صبح سویرے آپ کی آنکھ بھوک کی وجہ سے جلدی کھل سکتی ہے۔ ٧۔ سگریٹ نوشی‘ چبانے والے تمباکو کا استعمال کافی یا چائے کی زیادتی بھی آپ کی نیند کو متاثر کرتی ہے۔ ٨۔ جسمانی درد کی اور تکلیف کی صورت میں بھی نیند پر اثر پڑتا ہے۔ ٩۔ بخار کی کیفیت میں بھی نیند غائب ہوسکتی ہے۔ ١۰۔ جذباتی الجھنیں‘ نفسیاتی پریشانیاں اور ذہنی و جسمانی دبائو سے نیند متاثر ہوتی ہے۔ ١١۔ نفسیاتی امراض مثلاً تشویش کی بیماری‘ اداسی کی بیماری اور جنون و یاسیت کی بیماری سے لے کر شیز و فرینیا کی بیماری تک ہر قسم کی نفسیاتی بیماری میں نیند متاثر ہوتی ہے۔ ١٢۔ مختلف ادویات بھی نیند پر اثر ڈالتی ہیں۔ اب آپ کو اندازہ ہوگیا ہوگا کہ نیند کتنی نازک ہوتی ہے اور بے خوابی کے کتنے سارے اسباب ہیں۔ اب سوال یہ پیدا ہوتا ہے کہ کیا خواب آور ادویات سے بے خوابی کو دور کیا جاسکتا ہے؟ یوں تو خواب آور ادویات ایک زمانے سے استعمال کی جارہی ہیں اور یہ بھی کوئی ڈھکی چھپی بات نہیں ہے کہ ان ادویات کے استعمال کرنے سے نیند تو آجاتی ہے مگر جاگنے کے بعد طبیعت گری گری رہتی ہے اور مزاج میں چڑچڑاپن بھی پیدا ہوجاتا ہے۔ اس کے علاوہ نیند لانے والی دوائیں بہت جلد اپنے اثرات کھو بیٹھتی ہیں اور بعد میں آپ کو نیند لانے کے لیے ان دوائوں کی زیادہ مقدار کی ضرورت پڑنے لگتی ہے اور یوں کچھ دن بعد ان دوائوں کی عادت پڑ جاتی ہے۔ ڈائی زایام Diazeam گروپ کی ادویات کی یہ خصوصیات ان دوائوں کے استعمال میں احتیاط کا تقاضہ کرتی ہیں۔ ان خواب آور ادویات کو جتنی طویل مدت تک لیا جائے گا اتنا ہی ان کی عادت پڑ جانے کا خطرہ بڑھے گا۔ احتیاط کا تقاضہ تو یہ ہے کہ ان دوائوں کو بحالت مجبوری‘ بہت کم وقت کے لیے استعمال کیا جائے اور ڈاکٹر کی ہدایات کے مطابق استعمال کیا جائے۔ یہ بات بھی یاد رکھنا چاہیے کہ بہت ساری دوائیں ایسی ہوتی ہیں جو نیند کو بھگا دیتی ہیں۔ وہ دوائیں جو نیند کے نظام کو برے طور پر متاثر کرتی ہیں۔ ان میں شراب‘ وزن کم کرنے والی گولیاں‘ کوکین‘ چرس‘ گانجا اور نیند کو دور کرنے والی گولیاں شامل ہیں (مثلاً ایم فٹ امین )۔ Amphetamine