طبی ماہرین نے توقع ظاہر کی ہے کہ آکسیجن تھراپی (طریقہ علاج) کے ذریعے سردرد کی مختلف اقسام کا شافی علاج ممکن ہے اور مریض کو مختلف قسم کی درد ختم کرنے والی ادویات سے نجات مل جائے گی۔ جرنل آف دی امریکہ میڈیکل ایسوسی ایشن میں شائع ہونے والی اس طبی تحقیق میں سردرد کی درجنوں اقسام، ان کے دورانیے، اوقات کار اور وجوہات کا ذکر کیا گیا ہے اور ان دردوں کیلئے استعمال کی جانے والی ”پین کلر“ ادویات کے مضر اثرات کو بھی نمایاں کیا گیا ہے۔ ماہرین نے کہا ہے کہ آکسیجن گیس کے طریقہ علاج سے صرف 15 منٹ میں سردرد کی مختلف اقسام کو 78 فیصد تک دور کیا جا سکتا ہے اور اس طریقہ علاج کے مضر اثرات بھی نہیں ہوتے۔ ماہرین نے ابتدائی تجربات کے بعد امید ظاہر کی ہے کہ دنیا بھر میں لاکھوں سردرد کے مریضوں کیلئے یہ طریقہ کار بہت خوش آئند ثابت ہو سکتا ہے۔

 آسٹریلیا کے ماہرین نے کہا ہے کہ چائے اور کافی کا استعمال ذیابیطس کے خطرات کو کم کر سکتا ہے۔ کافی اور چائے پر ہونے والی فار انٹرنیشنل ہیلتھ یونیورسٹی آف سڈنی کے زیر اہتمام اس تحقیق میں 18 دیگر مطالعاتی رپورٹس بھی شامل ہیں۔ تحقیق کے دوران 4 لاکھ 60 ہزار افراد کا تجزیہ کیا گیا، ان میں سے 6 تحقیقات کافی پر جبکہ 7 چائے پر مشتمل تھیں جبکہ باقی کی چائے اور کافی پر مشترکہ تھیں۔ ماہرین کے مطابق دن میں تین سے چار دفعہ کافی یا چائے پینا ذیابیطس کم کرنے کے سلسلہ میں مفید ہے۔
 

طبی ماہرین نے کہا ہے کہ گردوں کے امراض سے بچاوٴ کیلئے وزن پڑھنے پر کڑی نظر رکھنی چاہئے جبکہ کھانے پینے میں کمی ، ورزش یا سرجری کے ذریعے فالتو چربی نکلوانے سے گردوں پر پڑنے والے بوجھ کو کم کیا جاسکتا ہے۔ کلینکل جرنل آف امریکن سوسائٹی آف نیفرالوجی کے زیر اہتمام کروائی گئی حالیہ تحقیق کے مطابق بتایا گیا ہے کہ وزن کم کرنے کے طریقوں پر عمل درآمد سے پہلے ڈاکٹرز سے مشورہ نہایت ضروری ہے، جس کی وجہ وزن میں اضافہ سے پیدا ہونے والی عارضہ قلب اور ذیابیطس کی پیچیدگیاں ہوتی ہیں ۔ ماہرین نے تازہ ترین تحقیق میں بتایا کہ وزن کم کرنے کے عمل سے ذیابیطس، بلڈپریشر، کولیسٹرول اور عارضہ قلب سے متعلق خرابیاں دور کرنے سمیت گردوں کی بیماریوں سے بچنے میں بھی مدد ملتی ہے۔