تاریخ اشاعت:۔22-06-2010

دہشتگردی اور اتحادیوں کا رویّہ

کالم۔۔۔  حافظ منصور جگیوٹ

ایک بھیڑئیے کے حلق میں ہڈی پھنس گئی تواسے جان کے لالے پڑ گئے۔جنگل میں بے چینی کے ساتھ بھاگتا پھر رہا تھا۔جان بچنے کی کوئی صورت نظر نہ آتی تھی۔اتفاق سے اس کی نظر ایک سارس پر پڑی۔بے تحاشہ اس کی طرف بھاگا اور کہنے لگا۔”بھیا سارس! میرے حلق میں ہڈی پھنس گئی ہے۔تمہاری چونچ بڑی لمبی ہے۔میرے حلق میں پھنسی ہڈی نکال دو۔ میں اس کے صلے میں تمہیں بڑی اجرت دوں گا۔“ سارس کو بھیڑئیے کی حالت پر بڑا رحم آیاتواس نے اپنی چونچ فوراً اس کے گلے میں ڈال دی۔ چونچ سے ہڈی کو پکڑ کر ایک جھٹکا دیا تو ہڈی باہر آگئی۔پھنسی ہڈی نکلتے ہی بھیڑئیے نے سکون کی سانس لی۔ جب سارس نے بھیڑئیے سے مزدوری مانگی تو اس نے خونخوار دانت باہر نکال کر غراتے ہوئے کہا! ”کیا یہ مزدوری کم ہے کہ تیری پوری چونچ میرے جبڑوں کے شکنجے میں آگئی تھی اورمیں نے اسے چبایا نہیں۔چبا دیتا تو مجھ سے مزدوری نہ مانگتا۔“
بدقسمتی سے دہشت گردی کے خلاف جنگ میں ہزاروں زندگیاںاور اربوں ڈالر کی قربانیاں دینے کے باوجودامریکہ اور اس کے اتحادیوں کا پاکستان کے ساتھ رویّہ نا قابلِ فہم ہے۔اتحادی ان احسانات کے جواب میں القاعدہ اور طالبان کی پشت پناہی اور طالبان کی اعلی قیادت کا پاکستان میں موجودگی کا مستقل الزام لگاتے رہتے ہیں۔ امریکی حکام ، ادارے اورمغربی و بھارتی میڈیا (نیویارک ٹائمز، واشنگٹن پوسٹ،بی بی سی،ٹائمز آف انڈیا)طے شدہ منصوبے کے تحت پاک فوج ، سکیورٹی اداروںاور جوہری ہتھیاروں کے خلاف بے بنیاد اور من گھڑت افواہوںاور جھوٹے الزامات کی نا کام مہم میں پیش پیش نظر آتے ہیں۔ تازہ ترین حملہ لندن سکول آف اکنامکس کی مرتب کردہ رپورٹ ہے جس میں الزام عائد کیا گیا ہے کہ آئی ایس آئی نہ صرف طالبان کو وسائل، تربیت اور پناگاہیں فراہم کرتی ہے بلکہ اس کے اہلکار طالبان شوریٰ کے اجلاسوں میں بھی شریک ہوتے ہیں۔رپورٹ میںصدر زرداری سمیت آئی ایس آئی کو ایک ہی تیر سے نشانہ بنایا گیا ہے۔کہتے ہیں کہ جھوٹ کا سر پاو ¿ں نہیں ہوتابالکل اسی طرح تحقیق کاروں نے جن 54افراد کا انٹرویوکیا ان کاحدود اربعہ اور شناخت تک ظاہر نہیںکی۔رپورٹ کا موضوع پاکستان کی سیاسی قیادت اور آئی ایس آئی کا کردار ہے لیکن سترہ کروڑ پاکستانیوں میں سے کسی ایک کو بھی اس قابل نہ سمجھا کہ ان کی رائے بھی لی جاتی۔ پاکستان نے اس رپورٹ کو بدنیتی اور قیاس آرائیوںپر مبنی قرار دیا ہے اور پاک فوج کے ترجمان نے کہا ہے کہ یہ الزامات ملک کی سکیورٹی ایجنسیوں اور فوج کو بدنام کرنے کی کوشش ہے۔ہم فوج اور خفیہ اداروں کی کارکردگی کی بدولت حالات بہتر بنانے کی کوشش کر رہے ہیں۔اس طرح کی بے بنیاد اور شرانگیز رپورٹوںکے پیچھے ان ممالک کا ہاتھ ہے جو پاکستان کو دہشت گرد ریاست قرار دینے کے خواب دیکھ رہے ہیں۔ چند ماہ پہلے امریکی سینٹ کی ایک رپورٹ شائع ہوئی تھی جس میں کہا گیا تھاکہ سن دو ہزار دو میں افغانستان کی تورا بورا کی پہاڑیوں پر ہونے والی بمباری میںاسامہ بن لادن پھنس گئے تھے۔اور اگر مزید امریکی فوج وہاں بھیج دی جاتی تواسامہ بن لادن کو وہاں سے بچ نکل کر پاکستان کے قبائلی علاقوں میںغائب ہوجانے کا موقع نہ ملتا۔ سابق برطانوی وزیراعظم گارڈن براو ¿ن نے رپورٹ کے منظرعام پر آنے کے بعد بیان دیاتھا کہ پاکستان کو ثابت کرنا ہوگا کہ وہ القاعدہ سے مقابلہ کرنے کی صلاحیت رکھتا ہے۔امریکہ اور اس کے اتحادیوں کی زبان درازیاں، ذلت اور موت سے بچنے، شکست چھپانے اورجان چھڑانے کے علاوہ کچھ نہیں۔اپنی ناکامی کی کالک ہمارے منہ ملنے کی ناکام کوششیں وقفے وقفے سے جاری ہیں۔
زمانہ اس حقیقت سے آشکار ہے کہ روس کے افغانستان کے نکلنے کے بعدجب طالبان نے حکومت سنبھالی تو امریکہ اور نیٹو کی یلغار تک عموماً پاکستان اور خصوصاً افغانستان میں کسی بھی قسم کی دہشتگردی نہ تھی اور نہ ہی خودکش حملے تھے۔افغانستان میں امریکی یلغار کے مقابلے میں شروع ہونے والی تحریک دراصل جہاد فی سبیل اللہ ہے۔ جب کوئی دشمن مقابلے کے لیے صف آراءہوجیسے افغانستان و عراق میں ہواتو مسلمانوں پر جہاد فرض ہو جاتا ہے ۔ ایسی تحریکوں پردہشتگردی کالیبل لگاکربدنام کرنے کا مقصدمسلم علاقوں میں ہونے والے مظالم اور بے انصافیوںکو چھپانااور امریکہ کی خود ساختہ اور منظم دہشتگردی پر پردہ ڈالنا ہے۔
امریکہ اور اس کے نیٹو اتحادی ہر طرح کا تباہ کن اسلحہ استعمال کرنے کے باوجود دہشتگردی کی جنگ میں جیت سے کوسوں دور ہیں۔ امریکی فوج کشی کے نو سال گزر جانے کے باجود وہاںآج بھی 72فیصد علاقوں پر طالبان قابض ہیں۔ یہی وجہ ہے کہ ایک طرف امریکہ2011ءمیںافغانستان سے اپنی افواج کی واپسی کے بارے میں سوچ رہاہے تو دوسری طرف تجزیہ نگاروں کا شورہے کہ افغانستان امریکہ کے لیے دلدل بن چکا ہے۔اس وقت افغانستان میں اڑسٹھ ہزارامریکی فوجی ہیں(امریکی صدر کے اضافی 30 ہزار فوجی اس کے علاوہ ہیں) جو دیگرممالک کی طرف سے بھیجی گئی بین الاقوامی فوج کے ساتھ طالبان سے نبرد آزما ہیں یوں افغانستان میں بین الاقوامی فوج کی تعداد ایک لاکھ سے متجاوز ہے۔اتنی بھاری فوج کی موجودگی کے باوجود کامیابی کی کوئی ضمانت نہیں۔جبکہ دوسری جانب بہت ہی قلیل عرصہ میں پاک افواج نے سوات کے بعد جنوبی وزیرستان کو بھی دہشت گردوں سے مکمل طور پر خالی کرالیاہے ۔ پاک فوج کی پوری توجہ دہشت گردی کے مکمل خاتمے اور سد باب پر مرکوز ہے۔ مگر اس کے باوجود امریکہ پاکستان کے کردار سے مطمئن نہیں۔ اس جنگ میںہم نے سب سے زیادہ نقصان اٹھایا ہے۔ اتنی قربانیوں کے باوجود دہشتگردی کے خلاف جنگ میں پاکستان کے کردار کو مشکوک قرار دینااور” ڈومور“کی گردان ہماری خدمات اور کاوشوں کو پسِ پشت ڈالنے کے مترادف ہے۔
استعماری طاقتوںکے سرخیل امریکہ کی پاکستان نے کب مدد نہیں کی؟ سوویت یونین کی افغانستان میں پسپائی سمیت امریکہ کا افغانستان میں برسربیکار جنگ میں اتحادی ہونامدد گار ہونے کا واضح ثبوت ہے۔ہماراپہلا احسان سوویت یونین کو افغانستان سے نکالنا تھا۔ پاکستان ہی نے طالبان کے ساتھ مل کراس وقت کی عالمی طاقت سوویت یونین کو پسپائی پر مجبور کیا۔اس کی شکست و ریخت کے بعد امریکہ بنا سپر پاوراور ہمیں انعام کیا دیا؟ بے وفائی اور دہشتگردی کا عذاب و القابات۔ ان سب کے باوجود دوسرا احسان گذشتہ نو سالوں سے پاکستان امریکہ کی جنگ لڑ رہا ہے۔ ہمارے جانی نقصانات جتنے ہوئے اور ہو رہے ہیں اس کا نصف بھی امریکہ کا نہیں ہوا۔
اتحادیوں کو علم ہونا چاہیے کہ جدید ترین ہتھیاروںا ورماہر افواج کی موجودگی کے باوجود افغانستان سے با عزت انخلاءمیں ممکنہ مددگارپاکستان ہی ہو سکتا ہے ایسے میںحلق میں پھنسی ہڈی نکالنے کے لیے لمبی چونچ والی سارس کی ضرورت ناگزیر ہے۔لیکن افسوس جب امریکہ کوڈو مور ڈو مور کا راگ الاپنے سے فرصت ملے گی تو معلوم ہوگا کہ حلق میں پھنسی ہڈی نکالنے والی لمبی چونچ بھی ہڈی کے ساتھ حلق مےں پھنس چکی ہے۔