ہجر کے ہر درد کا درمان ہے رمضان میں
قُربِ مولا کس قدر آسان ہے رمضان میں

متقّی ہونے کا سب سامان ہے رمضان میں
یہ خدا کا خاص اک احسان ہے رمضان میں

کاروبارِ جنسِ عصیاں بند ہے رمضان میں
مستقل جکڑا ہوا شیطان ہے رمضان میں

نفس کے شیطان کو قابو کرو گر کر سکو
بابائےِ ابلیس کا چالان ہے رمضان میں

عام سی کوشش پہ بھی ہے اجر بے حد و حساب
قرب پانے کا کھلا میدان ہے رمضان میں

بخششیں اور رحمتیں بٹتی ہیں بھر بھر جھولیاں
کس کو عذرِ تنگیِ دامان ہے رمضان میں

بھیگنا ہے جس کو بھیگے رات دن بوچھاڑ میں
مغفرت کا مستقل باران ہے رمضان میں
جو بکھیڑے ہیں جہاں کے جلد نپٹاﺅ انہیں
یکسوئی پانے کا تب امکان ہے رمضان میں

دن یہی رمضان کے ایّامِ معدودات ہیں
ربِ کعبہ کا یہی فرمان ہے رمضان میں

ماہِ رمضاں کے تقدس کا رہے ہر پل خیال
دوستو ! نازل ہوا قرآن ہے رمضان میں

وہ حِرا کی غار وہ تنہائیاں سر مستیاں
عشقِ مولا کا چھپا طغیان ہے رمضان میں

یہ مہینہ ہے مقدس اور تصّوف کا نچوڑ
عبد سے معبود خود یک جان ہے رمضان میں

روح تک اس کی اُتر جاتی ہے ٹھنڈی چاندنی
جس کے دل پر غلبہِ ایمان ہے رمضان میں

کھڑکیاں جنت کی کھل جاتی ہیں ہر اس شخص پر
راہِ مولا کی جسے پہچان ہے رمضان میں

عیش و غفلت میں فنا کر دے جو یہ گنتی کے دن
کون اتنا غافل و نادان ہے رمضان میں


ہے بہت بد بخت جو پھر بھی نہ بخشا جا سکے
بابِ جنت کھل گئے اعلان ہے رمضان میں

روح لاغر کی نقاہت کی بھی کچھ تو فکر کر
کیوں تری نظروں میں دستر خوان ہے رمضان میں

زینہ زینہ طے کرے گا معرفت کی منزلیں
جو بھی عرشی صاحبِ عرفان ہے رمضان میں