میں گونج ہوں عصرِ حاضر کی پھر بِس کو دوا کیا لکّھوں
جب دیکھوں ہر سُو کذب و ریا پھر صدق و صفا کیا لکّھوں

محسوس کیاجو لکھ ڈالا میںسچ کے سوا کیا لکّھوں
دِل چیر کے کاغذ پر رکھا، اب اور بتا کیا لکّھوں

اک عمر ہوئی لکھتے لکھتے ہر موضوع پر لکھ ڈالا
پھر آج تری فرمائش پر اے جان نیا کیا لکّھوں

کچھ میں ورق پر لکھا ہے کچھ اَن لکھی تحریریں
جو زیرک ہیں وہ پڑھ لیں گے میں کھُل کے بھلا کیا لکّھوں

جو بیت رہا ہے آج یہاں پہلے بھی یہی کچھ بیتا
کہنے کو نیا کچھ بھی تو نہیں اوروں کا لکھا کیا لکّھوں

جو غم کا مداوا کرنہ سکا، زخموں پر مرہم دھر نہ سکا
اُس ہاتھ کی کیا تعریف کروں اور دستِ شفا کیا لکّھوں

ہیں پاﺅں شل اور پیشِ نظر اک اور مسافت لمبی
اور عزمِ سفر بھی اپنا ہے کچھ یونہی سا، کیا لکّھوں

ہاں دِل پر یاس کے غلبے سے آواز میں تلخی آئی
مٹی سے اٹا ہے صحن چمن آندھی کو گھٹا کیا لکّھوں

اک عمر سے ساون بھادوں کی رُت آنکھوں میں آ ٹھہری
اب اس کے سوا شہرِ دِل کی میں آب و ہوا کیا لکّھوں


آسان نہیں تھی راہِ وفا مجھ ناداں کو معلوم نہ تھا
ہر گام پہ ٹھوکر کھائی ہے، اک لغرشِ پا کیا لکّھوں

جو طالب ہیں جو سالک ہیں خود راہ پہ چل کر دیکھیں
یاں درد میں مخفی لذت ہے لذت کا مزہ کیا لکّھوں

جینے کی تمنا ہے جس کو مرنا ہی پڑے گا اُس کو
صدیوں سے یہی اک نسخہ ہے، سامانِ بقا کیا لکّھوں

کامل ہے اگرچہ شوق مرا، اظہار اپاہج ناقص
مستور جو لاکھوں پردوں میں وہ روپ بھلا کیا لکّھوں

تو فضل سے اپنے جب چاہے اور جو چاہے لکھوائے
میں بندہ ہوں میں نوکر ہوں بے اذن بھلا کیا لکّھوں

آواز نہیں جو دہراﺅں الفاظ نہیں جو بولوں
جو اشکوں میں ڈھل جاتا ہے وہ حرفِ دُعا کیا لکّھوں

کہتی ہیں مری سکھیاں عرشی خوشیوں کے بھی نغمے لکھو
جس کو چے میں دِل برسوں سے آیا نہ گیا کیا لکّھوں

....................................................................