ضبط پر اب نہیں تیّار ، مجھے رونا ہے
دل ہے آمادہِ تکرار ، مجھے رونا ہے

اور کچھ بھی نہیں درکار ، مجھے رونا ہے
سامنے بیٹھ کے سرکار ، مجھے رونا ہے

ضبط ایسا تھا کہ خلوت میں بھی آنسو نہ بہے
آج لیکن سرِ بازار ، مجھے رونا ہے

میں کہ انسان کی عظمت پہ یقیں رکھتی تھی
کرچیاں ہیں مرے افکار مجھے رونا ہے

صرف اک حرفِ تسلی کی لگا دے مرہم
اور کچھ بھی نہیں درکار ، مجھے رونا ہے

زخم ناسور بنے جاتے ہیں رفتہ رفتہ
یہ تو اچھے نہیں آثار ، مجھے رونا ہے

جتنی مانی گئی ناصح ، تری مانی میں نے
آج مت روک اے غم خوار ، مجھے رونا ہے

میں کہ ہر زخم کو شعروں میں پرو دیتی تھی
شعر لکھنا ہوا دشوار ، مجھے رونا ہے

لفظ گونگے ہوئے اظہارِ بیاں سے عاری
کھو گئی طاقتِ گفتار مجھے رونا ہے

کچھ بھی ترکش میں نہیں اپنے بجز تیرِ دعا
نہ کوئی توپ نہ تلوار مجھے رونا ہے

فصلِ برسات ہے دریاﺅں میں طغیانی ہے
کوئی کشتی ہے نہ پتوار ، مجھے رونا ہے

خشک سالی سے تو پتھر بھی چٹخ جاتے ہیں
ہے شکستہ دلِ بیمار ، مجھے رونا ہے

خوب رو لے ترے در پر تو بہل جاتا ہے
بس یہی دل کا ہے تہوار ، مجھے رونا ہے

آ قریب اور قریب اور قریب اور قریب
لگ کے سینے سے ترے یار ، مجھے رونا ہے

صبر مشکل ہے بہت دل کا سکوں ہے رونا
کھل کے اے لذتِ آزار ، مجھے رونا ہے

میرے سینے میں غموں کے ہیں الاﺅ روشن
میری آنکھوں میں ہے منجدھار ، مجھے رونا ہے

آپ بیتی ہیں یہ اشعار کہ جگ بیتی ہیں
کیا مجھے اس سے سروکار مجھے رونا ہے

اشک روکے تو پڑیں دل میں دراڑیں پیارو
ریزہ ریزہ ہوا کہسار مجھے رونا ہے

میرے اشعار مرے دل کی ہیں قاشیں عرشی
یہ نہیں غوغائےِ بے کار ، مجھے رونا ہے