سورت زُمر کی آیت نمبر۴۵ سے متاثر ہو کر لکھے گئے اشعار
ترجمہ(تُو کہدے اے مرے بندو !جنہوں نے اپنی جانوں پر زیادتی کی ہے۔اللہ کی رحمت سے مایوس نہ ہو
یقیناً اللہ سب کے سب گناہ بخشتا ہے۔یقیناً وہ ہی بہت بخشنے والا،بہت رحم کرنے والا ہے)

گر چہ ہے گناہوں میں گرفتار چلا آ
آ پاس مرے میرے خطا کار چلا آ
بخشش مری ہر سمت تجھے ڈھونڈ رہی ہے
کیوں مجھ سے گریزاں ہے مرے یار چلا آ
سو بار بھی توبہ کو اگر توڑ چکا ہے
رحمت مری کہتی ہے کہ سو بار چلا آ
مایوس نہ ہو گر مرے وعدوں پہ یقیں ہے
وعدے کا میں سچا ہوں ستم گار چلا آ
ڈھک لے گی ترے عیب مری رحمتِ جاری
مت بھول مرا نام ہے ستار چلا آ
دو اشکِ ندامت ترے دوزخ کو بُجھا دیں
آنکھوں میں لیے اشکوںکی منجدھار چلا آ
میں کون ہوں کیا ہوں تجھے ادراک نہیں ہے
دیکھا ہی نہیں تو نے رُخِ یار چلا آ
دوزخ سے نہ ڈر چھوڑ دے جنت کی طمع کو
آ دیکھ مجھے طالبِ دیدار چلا آ
راہ دیکھ رہا ہے ترا خالق ، ترا مالک
مسجودِ ملائک ، مرے شہکار چلا آ
بندہ ہے تو بندے کے لیے عجز ہے زیبا
سر پر نہ سجا کبر کی دستار چلا آ
آ جا کہ کُھلے ہیں ابھی توبہ کے دریچے
قبل اس کے کہ ہو جائے تو لا چار چلا آ
مجبوری و مختاری کی بحثوں کو بھلا دے
بے کار نہ کر حجت و تکرار چلا آ
مٹی ہے تری خیر کا اور شر کا مرکب
تُو خیر کو لے شر سے ہو بے زار چلا آ
اوجھل نہیں تو مجھ سے بھٹکتے ہوئے راہی
پھرتا ہے کہاں ہو کے یونہی خوار چلا آ
ہاں دیر اگر ہے بھی تو اندھیر نہیں ہے
مجھ سا نہ ملے گا کوئی غم خوار چلا آ
میلے سے جہاں کے ترا دل ہی نہیں بھرتا
گھر میں ترے چیزوں کے ہیں انبار چلا آ
تاجر ہے اگر توُ تو رضا میری کما لے
ہو جائے گا کل بند یہ بازار چلا آ
اب چھوڑ بھی دے دنیائے فانی کے مزوں کو
آ چکھ تو سہی لذتِ دیدار چلا آ
تُو موت کے قدموں کی بھی آہٹ نہیں سنتا
کرتا ہے تجھے وقت خبردار چلا ا ٓ
پیارا ہے مجھے بندہِ تواب و مطہر
قُرآن کو پڑھ عجز میں سر شار چلا آ
کر دیتی ہے معدوم یہ فی ا لفور گناہ کو
توبہ میں نہاں ہیں عجب اسرار چلا آ
اب چھوڑ بھی دے ظلم و جفا کا یہ وطیرہ
یاں عجز فقط عجز ہے درکار چلا آ
یہ دل پہ جما زنگ اسی وقت کھرچ دے
ہو جائے گا کل کام یہ دشوار چلا آ
گردن میں تری طوق ہیں پیروں میں سلاسل
اس پر ہے عجب شوخیِ رفتار ، چلا آ
یہ کام ہے جلدی کا اسے ٹال نہ کل پر
کل آئے نہ آئے دلِ بیمار چلا آ
آدم ؑ نے بھی توبہ میں ہی ڈھونڈی تھیں پناہیں
آدم ؑ کے قدم پر ہی قدم مار چلا آ
کج رو کی نہیں ہے مرے کوچے میں رسائی
در گاہِ مقدس ہے یہ ہموار چلا آ
بہروپ نہ بھر عابد و زاہد کا نکمے
رگ رگ سے میں واقف ہوں ریا کار چلا آ ہونے کو ہے اب ختم تری عمر کی نقدی
ڈھلنے کو ہے اب شام خریدار چلا آ
خود تیری انا راہ کی دیوار بنی ہے
دیوار گرا بھول کے پندار چلا ا ٓ
اب چھوڑ بھی الفاظ کی جادو گری عرشی
کافی ہیں جو لکھ ڈالے ہیں اشعار چلا آ
٭٭٭٭٭٭٭